കലികാലം

പൂവിടാനിരിക്കുമ്പോൾ
ആകാശത്ത്
തലങ്ങും വിലങ്ങും പറക്കുന്ന
ഓണത്തുമ്പികളെക്കണ്ട്
കുട്ടികൾ
ബഹളം വയ്ക്കുന്നു

പൂക്കളം
അവരുടേതു മാത്രമായൊരു
ചിത്രമായിരുന്നു

മാഷവരെ പൂക്കള
ത്തെക്കുറിച്ചോർമിപ്പിച്ചു
കുട്ടികൾ മാഷിന്റെ
കൈ പിടിച്ചു പുറത്തിറക്കി
യാകാശം കാണിച്ചു കൊടുത്തു
യന്ത്രത്തുമ്പികളുടെ
ചിറകടികൾ നിറഞ്ഞ വാനം
വരാൻ പോകുന്ന
വിസ്ഫോടനങ്ങൾ
ചോരയും
കണ്ണീരും
കലർന്ന ദൈന്യത
മാഷിന്റെ മനസ്സിൽ
ഓണം മങ്ങിപ്പോയി
കാശിത്തുമ്പകൾ
നിറം കെട്ടു

കുട്ടികൾ പൂക്കളിടാതെ
യന്ത്രത്തുമ്പികളെയെണ്ണമെടുക്കാൻ
മത്സരിച്ചു കൊണ്ടിരുന്നു
നിർവികാരതയോടെ
മാഷവരെ നോക്കി നിന്നു !