അങ്ങനെ വള്ളത്തിലിരുന്ന് പോകുമ്പോൾ

അങ്ങനെ വള്ളത്തിലിരുന്ന് പോകുമ്പോൾ
എതിരെ മറ്റൊരു വള്ളത്തിൽ ഒരുവൾ

അവളുടെ മൊബൈൽ ക്യാമറയിൽ
എന്റെ വള്ളം
തൊട്ടുരുമ്മി കൊണ്ട് കടന്നു പോകുന്നു
എന്റെ മൊബൈൽ ക്യാമറയിൽ
അവളുടെ വള്ളം
ചിരിച്ചു കൊണ്ട്‌ കടന്നു പോകുന്നു

അവൾ ചിരിക്കുന്നു
ഞാൻ ചിരിക്കുന്നു
വള്ളങ്ങൾ അപ്പോഴേക്കും
പ്രണയത്തിലാവുന്നു
വള്ളങ്ങൾ ആലിംഗനബദ്ധരാവുന്നു
പിരിയാൻ കഴിയാത്ത വിധം അടുക്കുന്നു
എന്റെ വള്ളത്തിനു മീതെ
നിന്റെ വള്ളം
കമഴ്ന്നു വീണ്
പുൽകുന്നു

വള്ളങ്ങൾ തമ്മിൽ
മൂർച്‌ഛിച്ച
അതേ നിമിഷത്തിൽ
രണ്ടു ജീവനുകൾ
ചില്ലുതുമ്പികളെപ്പോലെ
വെള്ളത്തിൽ നിന്നുയരുന്നു
ആകാശത്തിന്റെ
ചതുപ്പിനുമുകളിൽ
വെയിൽ കാഞ്ഞ്‌
പറക്കുന്നു

കരമണലിൽ
ചലിക്കുന്ന
ദ്വിമാനചിത്രങ്ങളെപ്പോലെ
രണ്ടു നിഴലുകൾ അടുക്കുന്നതു നോക്കി
വള്ളങ്ങൾ
ക്ഷീണിച്ച് കിടന്ന്
ഉറക്കം പിടിക്കുന്നു.