മണ്ണിൽ
മുട്ടുകുത്തി
കുനിഞ്ഞിരുന്ന്
ഇന്നലെ പെയ്ത
മഴയുടെ ഇലകൾക്കിടയിലിരിക്കും
സൂക്ഷ്മജീവിതം
ക്യാമറയിൽ
പകർത്തുകയായിരുന്നു
ഭീമാകാരനായ ഒരു ജന്തു
തന്നെ പകർത്തുന്നത്
ഭയത്താൽ
പകർത്തുകയായിരുന്നു
അതും
ഒട്ടും സങ്കോചമില്ലാതെ
സമയം കടന്നു പോയിക്കൊണ്ടിരുന്നു
പതുക്കെയെങ്കിലും
മരണത്തിന്റെ തോന്നലിൽ നിന്ന്
ഇഴഞ്ഞകന്നു പോകാൻ
അതിനു കഴിഞ്ഞിരിക്കാം
എത്ര കിണഞ്ഞിട്ടും
ആ തോന്നലിൽ നിന്ന്
ഇഴഞ്ഞു പോകാനാവാതെ
അവിടെത്തന്നെ
മുട്ടുകുത്തിയിരുന്ന്
വേരുപിടിക്കുകയായിരുന്നു ഞാൻ!
പി എ അനിഷ് അശോകൻ
No comments:
Post a Comment