കണക്കായിരുന്നു
കണക്കുചെയ്യാനറിയാത്ത കുട്ടി
ജനലിലൂടെ
മഴ നോക്കിയിരുന്നു
മഴകാണുന്ന കുട്ടിയെ നോക്കി
ടീച്ചര്‍ ഓരോന്നോര്‍ത്തു
പെരിക്കപ്പട്ടികയുടെ
കറുത്തപുസ്തകം മടക്കിവെച്ച്
കുട്ടികളെല്ലാം
അവളെ നോക്കിയിരുന്നു
കനത്തൊരിടിവെട്ടി
ക്ലാസ് മുറിയെ
പേടിപ്പിച്ചിരുത്തി
കണ്ണിറുക്കിയടച്ച
ക്ലാസില്‍ നിന്ന്
മഴയിലേക്കിറങ്ങിപ്പോയ കുട്ടിയെ
ആരും കണ്ടില്ല
ടീച്ചറും പിന്നെയവളെ
ക്കുറിച്ചോര്‍ത്തില്ല
മഴയിലേക്കിറങ്ങിപ്പോയ കുട്ടി
ടൈംടേബിളില്‍
അവസാനത്തെ പിരിയഡ്
മഴയെന്നു തിരുത്തി
ചേമ്പിലച്ചോട്ടില്‍ നിന്ന്
പച്ച നിറമാര്‍ന്ന
ആകാശത്തെ നോക്കി
പിന്നെ
ചോര്‍ന്നൊലിയ്ക്കുമോര്‍മകളില്‍
മഴയെന്നാണു
തന്റെ പേരെന്നു കുറിച്ചിട്ടു !
8 comments:
മഴയിലേക്കിറങ്ങിപ്പോയ കുട്ടി മഴക്കുട്ടി. നല്ല ചന്തം
മഴയിലേ ക്കിറങ്ങിപ്പോയ കുട്ടി
മഴയായ് പെയ്തിന്നെന്റെ മുട്ടത്ത്!
നല്ല വായന , നല്ല ഭാഷ !
മുറ്റത്ത്‌...:)
ചോർന്നൊലിക്കുമോർമ്മകളിൽ മഴയെന്നാണു തന്റെ പേരെന്നു കുറിച്ചിട്ട മഴയിലേക്കിറങ്ങിപ്പോയ പെൺകുട്ടി.
മഴയായ പെൺകുട്ടി.
സുന്ദരമായ രചന.
ചിന്തിപ്പിക്കുന്നതും.
അവസാനത്തെ പീരിയഡ്‌ കണക്കായൊലിച്ചു പോയി
ആശംസകൾ
മഴയിലേക്കിറങ്ങിപ്പോയ കുട്ടിയെ ആരും കണ്ടില്ല. ടീച്ചറും അവളെ ഓര്‍ത്തില്ല.
എന്തേ ഇങ്ങനെ എന്നത് ആരും ചോദിച്ചില്ല?
നല്ല കവിത
Post a Comment