Saturday, August 28, 2010

ബെല്ലും ബ്രേക്കും

കുട്ടികളങ്ങനെയാണ്
ബെല്ലും ബ്രേക്കുമില്ലാതെ വരും

കൂട്ടബെല്ലടിക്കുമ്പോ
ളൊരു തേനീച്ചക്കൂട്ടമായ് മാറി
യിരമ്പിക്കൊണ്ടു കടന്നുപോകും

നോക്കിനടന്നില്ലെങ്കിലുറപ്പാ
ണൊരു പന്തുവന്ന്
തലയില്‍ കൊള്ളും
പെന്‍സിലസ്ത്രമായ് മാറി
ചീറിയെത്തും

റോക്കറ്റുകള്‍
കണ്ണില്‍ തറയ്ക്കും

ഔട്ടല്ലെന്നു
മൂളിക്കൊണ്ടൊരു
സ്റ്റമ്പു പറന്നു വന്ന്
ചെളി തെറിപ്പിക്കും

പാതകളില്ലാതെ
പോയ കാലത്ത്
കണ്ണുവച്ചെറിഞ്ഞതെല്ലാ
മിന്നു മടക്കിയെറിയുകയാണോ
എത്രയോരം ചേര്‍ന്നു
പോയിട്ടും?

ബെല്ലടിച്ചതു കേട്ടില്ലേ
ബ്രേക്കിട്ടതറിഞ്ഞില്ലേ
കല്ലെറിഞ്ഞ കാലമൊക്കെക്കഴിഞ്ഞു
ഇനിയേറുകൊളളാനുള്ള സമയമാണ്

എത്രയോരം ചേര്‍ന്നു
പോയാലും.

(ബൂലോകകവിത ഓണപ്പതിപ്പ്)

6 comments:

മുകിൽ said...

കല്ലെറിഞ്ഞ കാലമൊക്കെക്കഴിഞ്ഞു
ഇനിയേറുകൊളളാനുള്ള സമയമാണ്"
കൊള്ളാം..

anoop said...

എത്രയോരം ചേര്‍ന്നു
പോയാലും..
ഇനിയേറുകൊളളാനുള്ള സമയമാണ്..
aasamsakal

സലാഹ് said...

ഓരംപോലുമോരിവച്ചുവാരിക്കുഴിയൊരുക്കുന്ന തിരക്കിലാരിതൊക്കെ കാണാന്. ബെല്ലും ബ്രേക്കുമില്ലാത്ത ജീവിതം വായിച്ചു. നന്ദി

ശ്രീനാഥന്‍ said...

അതെ മാഷെ കുട്ടികൾക്ക് ബെല്ലും ബ്രേക്കുമില്ല, കല്ലെറിയും,പന്തെറിയും-അതെല്ലാം മാഷന്മാരും മാലോകരും സഹിച്ചേ പറ്റൂ, ആനന്ദകരമാണ് അത്, ശല്യമെന്നു കരുതരുത്, ആയകാലത്ത് നാമിതൊക്കെ ചെയ്തതല്ലേ? പക്ഷേ ഇതൊന്നിനും കഴിയാതെ എൻട്രൻസ് മാത്രം ജപിച്ചു വളരുന്നൊരു തലമുറയെക്കുറിച്ചല്ലേ നാം വ്യാകുലപ്പെടേണ്ടത്? നല്ല മൌലികതയുള്ള കവിത, അഭിനന്ദനം.

പി എ അനിഷ്, എളനാട് said...

നന്ദി പ്രിയപ്പെട്ട
മുകില്‍
അനൂപ്
സലാഹ്
ശ്രീനാഥന്‍

സസ്നേഹം

Sabu M H said...

:)

കിളിവാതില്‍

Text selection Lock by Hindi Blog Tips

  © Blogger template Palm by Ourblogtemplates.com 2008

Back to TOP