Tuesday, December 28, 2010

കിളിയാട്ടല്‍


കോവല്‍വള്ളികള്‍ പടര്‍ന്ന്
തടിച്ച വിരലുകള്‍പോലെ
ഭൂമിയിലേക്ക് ചൂണ്ടുന്ന
കായ്കള്‍ നിറഞ്ഞ
പന്തലുകളിലാണ് ജീവിതം

കിളികള്‍ വന്ന്
കൂട്ടത്തോടെ
ജീവിതം കൊത്തിയെടുത്തു പോകു
മതിനാല്‍
കിളിയാട്ടുവാന്‍
നട്ടുച്ചയ്ക്ക്
കവുങ്ങിന്‍ ചോട്ടിലിരിയ്ക്കുന്നു

വെയിലാറുമ്പോള്‍
വരുന്നൂ കിളികള്‍
പലനിറക്കലര്‍പ്പുകള്‍
തൊപ്പിയുമിളം തൂവലുകളുമൊരു നിറം
മിഴിയരികില്‍ മറ്റൊരു നിറം
അങ്ങനെയങ്ങനെ
പലനിറച്ചിലപ്പുകള്‍
കൊക്കിലാകാശം കൊരുത്തിട്ടവയും

അവയോടു പറയുന്നു
വിളയുന്നു നിങ്ങള്‍ക്കായ്
പലവൃക്ഷഫലങ്ങള്‍
മധുരങ്ങള്‍
ചവര്‍പ്പുകള്‍

വിടരുന്നൂ നിങ്ങള്‍ക്കായ്
കാടുകള്‍ വെയിലുകള്‍
വിഹായസ്സ്

ഞരമ്പുകളായ് ജീവന്‍തുടിയ്ക്കും
വള്ളികള്‍ക്കു മുകളിലവയുടെ നൃത്തം
വിശപ്പാറും സീല്‍ക്കാരങ്ങള്‍

പിറ്റേന്നു കാലത്ത്
ഒഴിഞ്ഞൊരു കിളിക്കൂടായ് നിന്ന
കോവല്‍പ്പന്തലെടുത്തു
കൊണ്ടുവന്ന്
ഇറയത്ത് തൂക്കിയിട്ടു.

14 comments:

mp hashim said...

നിറച്ചിലപ്പുകള്‍ !
താങ്കള്‍ക്കു മാത്രം പറയാനാവുന്നത്!

നിങ്ങളുണ്ടാക്കുന്ന വാക്കുകളുടെ ഓളം
ഉള്ളിലിങ്ങനെ ഉലഞ്ഞു നില്‍ക്കുന്നതിനാലാവാം
ഈയുള്ളവനും ...എന്തെങ്കിലും എഴുതുമ്പോള്‍
കടലാസിലെയ്ക്കത് ഇറങ്ങിവരാന്‍ ശ്രമിക്കാറുണ്ട്.

പക്ഷെ.. അങ്ങിനെയൊന്നും ഉപയോഗപ്പെടുത്തിയിട്ടില്ല കേട്ടോ ...

സ്നേഹം ....

MyDreams said...

ഒരു അനീഷ്‌ കവിത

ആറങ്ങോട്ടുകര മുഹമ്മദ്‌ said...

കൊക്കിലാകാശം കൊരുത്തിട്ടവയും..
വിശാലമായ,മനോഹരമായ ഭാവന..

എന്‍.ബി.സുരേഷ് said...

അനീഷിന്റെ കവിതയിൽ നിരന്തരം പ്രകൃതിയുടെ ചായങ്ങൾ, പക്ഷിച്ചിറകുകൾ, ആകാശനിറങ്ങൾ, മരങ്ങളുടെ മർമ്മരങ്ങൾ, മനുഷ്യന്റെ കുപ്പായം ഊരിയെറിഞ്ഞു പച്ചജീവിതത്തിൽ ലയിക്കാൻ കൊതിക്കുന്ന മനുഷ്യർ,

ആരാണ് ഭൂമിയുടെ യഥാർത്ഥ അവകാശികൾ എന്ന ചോദ്യങ്ങൾ.

ലോകത്തെ മാറ്റൊരു തരത്തിൽ കാണാനുള്ള കണ്ണുകൾ.

ജീവിതം തുടിക്കുന്നുണ്ട് കവിതയിൽ മനുഷ്യരുടേതല്ലാത്തതും.

പി എ അനിഷ് said...

നല്ല വാക്കുകള്‍ക്കും സ്നേഹത്തിനും
പ്രിയ ഹാഷിം,മൈ ഡ്രീംസ്, ആറങ്ങോട്ടുകര മുഹമ്മദ്ക്ക
ഹൃദയം നിറഞ്ഞ നന്ദിയോടെ

പി എ അനിഷ് said...

കവിതയെ സസൂക്ഷ്മം വിലയിരുത്തുകയും വിമര്‍ശിക്കുകയും തിരിച്ചറിയുകയും ചെയ്യുന്ന
സുരേഷ് മാഷിനും

ശ്രദ്ധേയന്‍ | shradheyan said...

കിളിയാട്ടുവാന്‍, പലനിറക്കലര്‍പ്പുകള്‍, പലനിറച്ചിലപ്പുകള്‍... പുതുവാക്കുകളുടെ നിരത്തിവെപ്പിലും കൃത്രിമം ഒട്ടും തോന്നിക്കാത്ത ഈ മിനുക്കുപണി അനീഷിന്റെ വൈദഗ്ധ്യമല്ലാതെ മറ്റെന്ത്! നല്ലൊരു കവിതയ്ക്ക് ആശംസകള്‍.

രാമൊഴി said...

kavitha ishtappettu..

M.R.Anilan -എം. ആര്‍.അനിലന്‍ said...

ഞരമ്പുകളായ് ജീവന്‍തുടിയ്ക്കും
വള്ളികള്‍ക്കു മുകളിലവയുടെ നൃത്തം - നൃത്തം തുടരട്ടെ!

M.R.Anilan -എം. ആര്‍.അനിലന്‍ said...
This comment has been removed by the author.
moideen angadimugar said...

അനീഷിന്റെ കവിതക്ക് ഒരു പ്രത്യേകത തന്നെയുണ്ട്.ഇപ്പോൾ ഒരുനല്ല കവിത വായിച്ച സുഖം.

Mahendar said...

പലനിറച്ചിലപ്പുകള്‍
കൊക്കിലാകാശം കൊരുത്തിട്ടവയും
nice..
yet another typical aneesh poem!!!

ശ്രീനാഥന്‍ said...

splendid!

vivekpayyoli said...

good

കിളിവാതില്‍

Text selection Lock by Hindi Blog Tips

  © Blogger template Palm by Ourblogtemplates.com 2008

Back to TOP